UPOKO II. Ko nga tikanga o te mahi nei, o te HOKOHOKO.
[Image of page 17]
UPOKO II.
Ko nga tikanga o te mahi nei, o te HOKOHOKO.
He aha ra no te tangata, i kore ai e hanga i te Rawa i pai ake ai tona ngakau--tena tangata, ka hanga i te mea mona ano--nei ra--puta ke ki nga whare o nga Hoa hokohoko ai?
E Hoa, tenei ano te tikanga--ko te tikanga tenei--Akuanei, ka haere ko koe ki te whare o te Kai Hanga Hu patai atu ai ki a ia, nona ekore nei e hanga Tepara mona, Turu Nohoanga ranei--i te tini noa iho o te Taonga--akuanei ia karanga mai ai--e Hoa--ekore ianei koe e mohio--te tikanga ianei i kore ai au e hanga Taonga moku ake ano-- koia tenei; he tini no nga Kani--no nga Purupuru--no nga aha--no aha--hei hanga, hei raweke--ka oti ai te Nohoanga kotahi--mehemea, i mano nga Nohoanga, e tika, kia tahuri au ki te raweke i tenei mahi--inahoki--ahakoa Tohunga au ki te raweke i nga purupuru i nga whao--ekore ianei anei mea e oti kau te hanga--engari, ma te ahi kia tahuna, ka oti ai nga whao te hanga a--ahakoa oti--oti rawa ake--he turu kikino, ka pa ianei he tangata mohio au ki tenei mahi ki te Kamura--e pai te hanga--engari ano ia he Hu; naku taku Mahi, te hanga Hu--oti noa ake nga tekau pea Hu i au--tena ko te Nohoanga kotahi, ekore e oti--waihoki, whakaritea ianei taua tikanga nei ki te Kamura--Ki te Kai tui Kakahu ranei--tena ratou e ki katoa mai, ekore
[Image of page 18]
mohiotia e matou--engari ano, me mahi ake tena tangata i tana mahi--i tana mahi i mohio ai ia--muri iho--he pai anake ki te hokohoko atu ki nga taonga o tera atu; Ko nga pai anei o te tikanga nei o te Hokohoko.
He Iwi ano--kaore i a ratou te tikanga Hokohoko o te Moni--ko te tikanga o tera whenua--he whenei--ka hanga ko te tangata i tona whare ake ano--hanga ai ano hoki i ona Weruweru--i tona Waka hei hoenga ki te hi--i nga aha noa iho--i nga aha noa iho--Apiti mai hoki ko tana Mara--ko ia ano hei kai Ngaki--tona tukunga iho--he Iwi Rawakore--he kino noa iho--he kore--e ata mohio ki te mahi--Nakonei hoki, ka tare tonu nei te ngakau o te tangata kia waiho--koia ano hei tohunga hei Kai Hanga i nga mea katoa--tena te kino kei muri iho--i kino te hangahanga o nga taonga, i kinotahi hoki te ahua o nga tangata o era whenua--he tokohia ake nei ano nga tangata, mate noa i te Kai kore--i runga o te oneone kua kiia--mei mahia e te mohio, he mano te tangata hei kai i nga kai--ko nga tukunga iho anei o nga whenua--kaore nei he moni hei takawaenga--kahore nei he Hokohoko.
